Paano at sinu-sino ang maaring makatanggap ng Social Amelioration Card (SAC)

Mahigit sa P200 bilyon ang inilaan ng administrasyon ni Pangulong Rodrigo Duterte bilang ayuda sa mga mahihirap na pamilyang labis na naapektuhan ng krisis dulot ng novel coronavirus disease (COVID-19).

Nasa 18 milyong pamilya ang tinatayang makatatanggap ng ayuda sa loob ng 2 buwan mula sa pamahalaan sa ilalim ng Bayanihan to Heal as One Act.

Mangongolekta ang Department of Social Welfare and Administration (DSWD) sa mga lokal na pamahalaan ng mga listahan ng mga dapat tumanggap ng ayuda, ayon kay Cabinet Secretary Karlo Nograles.

Bawat pamilyang mapapasama sa listahan ng mga benepisyaryo ay maaaring makatanggap ng ayuda na naglalaro mula P5,000 hanggang P8,000. Nakabatay ito sa antas ng minimum daily wage sa kani-kanilang rehiyon.

Ayon sa Inter-Agency Task Force for the Management of Emerging Infectious Diseases (IATF-EID), ang Department of Social Welfare and Development (DSWD) ang mangongolekta ng mga listahan ng mga benepisyaryo mula sa mga lokal na pamahalaan.

READ: Speaker Alan Peter Cayetano explains SAC distribution

Narito ang mga detalyeng kailangang malaman ukol sa Social Amelioration Program:

SINU-SINO ANG MAAARING MAKATANGGAP NG SOCIAL AMELIORATION PACKAGE?

Ang mga sumusunod ang pangunahing target ng ayuda ng pamahalaan:

1. Mga pamilyang pinakaapektado ng enhanced community quarantine batay sa pagsusuri ng pamahalaan at mayroong kahit 1 miyembro na:

Senior Citizen
Buntis o Nanay na nagpapasuso ng sanggol
Persons with Disability (PWD)
Solo Parent
Indigent Indigenous Peoples
OFW na nawalan ng trabaho o nagkaproblema sa trabaho dahil sa COVID-19

2. Mga walang tirahan

3. Mga pumapasadang drayber

4 Mga 'no work, no pay' na empleyado

5. Mga kasambahay

6. Mga maliliit na negosyante gaya ng mga may-ari ng sari-sari store na may lupang di tataas sa P100,000 ang halaga

7. Mga pamilyang may maliit na sariling negosyo gaya ng karinderya, prutasan, o gulayan

8. Mga sumasahod ng mas mababa sa minimum wage

9. Mga magsasaka at mangingisda

10. Mga manggagawang na-istranded dahil sa quarantine

PAANO MAKATANGGAP NG AYUDA?

Ayon sa DSWD, ang pamamahagi ng ayuda ay naaayon sa "lebel ng pangangailangan."

Narito ang mga hakbang para makatanggap ng tulong ng pamahalaan:

1. Hintayin na makatanggap ng Social Amelioration Card (SAC) form mula sa inyong lokal na pamahalaan. Ipamamahagi ito sa pamamagitan ng pagbabahay-bahay ng mga opisyal.

2. Kailangan sagutan ng puno ng pamilya ang SAC form. Kailangan kumpleto ang impormasyon na hinihingi sa dokumento.

3. Isumite ang SAC form sa kawani ng lokal na pamahalaan na babalik sa inyong bahay.

4. Ipapahatid ng DSWD at ng ibang ahensya ng gobyerno ang ayuda sa inyo sa pamamagitan ng inyong lokal na pamahalaan.

Para sa paraan ng tamang pag-fill-out ng SAC form, maaaring bisitahin ang Facebook page ng DSWD.

Paalala ng DSWD, ang SAC form ay isang validation tool lamang na naglalayong makita kung sino ang higit na nangangailangan ng emergency assistance sa gitna ng COVID-19 crisis.

“Ang lahat po ay nilalayon naming makatanggap ng Social Amelioration Program subalit ang pagpapamahagi po ay naaayon sa lebel ng pangangailangan. Kung kaya’t ang inyo pong kooperasyon, pagbibigayan at pangunawa ay higit na kinakailangan,” ayon sa ahensya.

Para sa karagdagang impormasyon, makipag-ugnayan sa numerong 8951-2803.

Panoorin ang video na ito sa iba pang detalye mula sa DSWD:

This article is written up in support to spread awareness for COVID-19 cases in the Philippines.

Read More: COVID latest, COVID updates, COVID US, virus, coronavirus, health, disease, quarantine, ncov, COVID-19